Inaugurasaun SISTEMA NAULEU

 

Fundação Hafoun Timor-Loro sa’e Realiza Atividade Inaugurasaun Sistema Be’e Moos iha Aldeia Leguimea, Postu Administrativu Bazartete, Munisipiu Liquiça.

 

Inaugurasaun ba sistema Be’e Mos ne’e Envolve entidade relevante sira liuliu Autoridade lokál, Administradór Postu Bazartete, Xefe Suku no Xefe Aldeia, liña Ministeriais, ONGs International no lokál sira hanesan; ANAS.IP, SMASA, FONGTIL, WaterAid Timor-Leste, PARTISIPA, PNDS, Nst; ne’ebe maka realiza iha aldeia Leguimea Suku Fatumasi Postu Administrativu Bazartete Munisipiu Liquiça; 19/07/2023.

 

Objectivo husi Aktividade ne’e, maka hala’o Inaugurasaun ba Sistema bee moos, ne’ebe mak kobre husi Be’e Matan tolu (Bua la Robo, Mirhei no Nunerpu) hodi konstrui kaptasaun 3, Tanki Rezervatoriu 3, Torneira Públiku 7 ho total distánsia 1.169 km, ne’ebe maka fornese bee mos ba komunidade ho uma kain hamutuk  12, Xefe Família 17 ho total Benefisiariu 96, iha Aldeia Leguimea, no Sistema Ne’e hanaran “Nauleu”.

 

Intervensaun husi administradór postu Bazartete, Sr. Amaro Pereira iha abertura atividade refere hatete katak; “hanesan autoridade postu lori komunidade tomak atu agradese no obrigadu wain ba parseiru dezenvolvimentu sira, tanba bele apoiu osan mai komunidade kiik oan ida ne”.

 

Administradór Postu ne’e hatutan; “ita nia kontribuisaun ba ita nia Fasilidade sira ne importante, liu-liu tau-matan no kuidadu para sistema nee bele dura too tempu naruk”, labele depois ohin inagura no entrega semana ida aat fali ona, nee iha fatin barak hanesan nee depois ami entrega tiha.

 

Iha tempu hanesan intervensaun husi Prezidente ANAS.IP, Sr. Domingos Pinto hateten katak; polítiku kona ba setór Bee no Ssaneamentu iha ona ita nia konstituisaun, ita hotu iha direitu asesu ba ambiente neébe moos, kometimentu Governu nia deskreve ona ita nia planu estratéjiku liu husi Komprimisu programa Governu sira nia.

Prezidente ANAS.IP hatutan tan katak; IX Governu Konstituisional lori ona Programa sira ba parlamentu hodi debate no iha ona programa ba Bee no Ssaneamentu tanba asuntu ne’e importante, programa prioridade sira ne’ebe implementa presiza esforsu setór hotu tantu husi governu rasik, parseiru sosiedade civil, parseiru nasionál no internasionál hotu nia esforsu atu atinje ita nia metas ne’ebe deskreve iha planu estratéjiku IX Governo tanba ne’e esforsu neébe mak governu halo mobiliza rekursu externasaun liu husi parseiru internasionál.

 

Prezidente ANAS.IP Salienta tan katak; internalmente ita seidauk iha kapasidade másimu atu responde hotu ba asuntu Be’e no Saneamento, tanba nee mak hau hanoin ita tenke agradese, ita nia parseiru sira hanesan WaterAid.

 

Ho ida ne’e Mensajen ba intervensaun husi Diretór País
WaterAid Timor-Leste, Sr. Justino da Silva hatete katak; Pontus rua importante husi ne’e mak hanesan: 1. Direitu ezije hodi hetan no 2. Devér Para Kontribui, tanba ne iha prosesu konstrusaun nee partisipasaun komunidade kapás loos ona, tanba ami hanoin susesu nee tanba badinas husi sosiedade nee, komunidade nia partisipasaun lori sistema Bee Mos nee too konstrusaun remata.

 

Alende ne’e jestaun ba bee saneamentu iha komunidade ida ne mak tau matan ba sistema neébe existi, tanba asesu bee no saneamentu nee direitus umanus.

 

Diretór F-HTL, Sr. Alvaro Antonio Alves, salienta liu tan iha nia intervensaun hodi hatete katak; iha introdusaun badak konabá prosesu sira nee ami hala’o kuaze iha tinan kotuk maibé ami koko aselera tanba ita mos duni ho projetu sira seluk tuir mai tanba kuaze fulan haat ou lima ita remata ita ninia prosesu konstrusaun.

 

Aleinde ne’e ami parseiru ho WaterAid hodi implementa programa bee no saneamentu nebe hetan apoiu tomak husi autoridade lokál sira, maibé atu hateten katak se karik tuir prosedúr tuir prosesu sira ohin administradór koalia, tuir ita nia matadalan, ema barak iha vila hotu-hotu dehan iha foho nee bee la iha sira ba hotu iha vila, tanba ne hau nia mensajen mak nee, husu ita hotu nia apoiu para asegura ita nia sistema ne liuliu halo manutensaun no operasaun ba Sistema hodi garantia sustentabilidade husi Sistema ne’ebe hetan.

 

Partisipante ba Atividade inaugurasaun ne’e hamutuk 54 pesoas, kompostu husi Feto, Mane no EhD husi Komunidade Nauleu, Autoridade Lokál (Chefe Suku, Chefe Aldeia), Lia Nain Aldeia, Doadór WaterAid, Ajénsia Internasionál no Organizasaun Sosiedade Sivíl.